2Cor 9 | MMX | STEP | Ixok pakes tia xusu ana malagan tinimi mumu loklok tooro miba lox aonon i uto ri limixin at ne Moroa di nemen to Judaia.

2 Corinthians 9

1 Ixok pakes tia xusu ana malagan tinimi mumu loklok tooro miba lox aonon i uto ri limixin at ne Moroa di nemen to Judaia. 2 Akleklen i do nemi mi gagas amisik kusu ri lok tooro, kuren la a lox aru amisik nimi ri limixin Masadonia. Aga tong i ridi do nemi limixin to Grik mi gagas kusu ri lok tooro, ga ru ka i at no lamaares ga xap. Mo lavavara atnemi ga lox axatu buaang levendoxoma xeneng atdi xusu nedi bok dina lok tooro. 3 Mo nga nia ana riki aonon na luvutneton dik, kusu lavapaase aru atnama mumu nimi xeneng at laramtaba atnimi noxo ravasu ngan lavanga gamasa mun. Ketla i ngan nia ara tong pam i do, minaba gagas li mo loklok tooro atnemi. 4 Panga tentaba me Masadonia na emu minia udom saparap nimi la dina long lenger i do nemi mixo gagas; maba mangan aleng mumu nimi, la maba tong ka lavanga sala atla maga nuunu abos do miba lox epovo i. La ni lavanga mamangan tinimi. 5 Kuren la a doma i do i epovo do ana sing na luvutneton dik kusu dinamgo ria udom atnimi xusu dina gagas li avot be nimi ri laramtaba nemi miga vaase alii min. Minaba gagas at loxonaleng do nia ana vot, la na laramtaba ba lox asuusu i do mi etaba mila miga vara i xuren, la kopmen do miga morong min.

Lavapaase Poovo Mumu Loklok Ti Raba

6 Mina doma i na, neni do itlotlo tevempanga lixilik mun naba ruuna tevempanga lixilik bok; la laradi do itlotlo taxanit panga solo, neni naba ruuna teveluxa solo. 7 Nedi getgesara dina raba kerekngan lodoxoma atdi la nemen gat loklox angtungun kopla tara na pu soso di, mila ne Moroa i momo mi laradi i raba mi lomomo xeneng teren. 8 La ne Moroa xa i epovo na raba nimi mi leveloklox anarong axap naba umsu aleng, kusu at levenaleng axap miba ruuna epovo amisik at levempanga axap la ne Moroa xa ba lok levempanga atnimi mitlotlo i na pisik nunuan kusu miba epovo rinotno do mina lok leven gugu nunuan. 9 Kerekngan Lovoang Kaala i tong i do,

“Neni im taba mi lomomo rinedi limixin banbalo, mo loklok teren tim taba naba nemen amisik.” ^a

10 Moroa im taba levenit panga ritlotlo mi levengkongkide ri anan la kerepmo neni naba raba bok nimi mi levenit axap nemi mik pakes tin la na lox asuusu i xusu miba pisik asu leven gugu nunuan i buaang aleng. 11 Neni nabak lok nimi minap novos aleng at levempanga axap, kusu miba lok tooro amisik limixin petpes. La buaang bok atnedi limixin diba tong aorong ti ne Moroa ri laramtaba atnimi ridi, no miba raba mu nama min.

12 Mo loklok tooro ap mo laramtaba atnimi noxo ven mun ti lavakpakes at limixin at ne Moroa, ketla ba lox asuusu bok buaang lorotong avukat keneng at lorooro atdi ri ne Moroa. 13 Mo laramtaba atnimi ba lox asuusu i do nemi limixin tuturun; la limixin petpes diba emi asu mi ne Moroa mumu lorongtonga res mi lurutu lolos atnimi ri Lagale Lavavang at ne Karisito, la mumu bok mo lomomo atnimi ri lok tooro mi leventamtaba ridi la ti limixin petpes bok. 14 La diba sing lolos bok tinimi mi labalamu rinotno xeneng at lorooro atdi, mumu lugugu asuusu atnimi ri lagale letaba nabalamu at ne Moroa, mo neni ga raba nimi min. 15 Ata tong avukat tinotno ri ne Moroa ri mo laramtaba ren tidik i silok aleng tinotno.